"Chamak Jugnoo Ki Baraq e Be-Amaan Maloom Hoti Hai"A Beautiful Urdu Ghazal By Allama Semab Akbar Abadi

چمک جگنو کی برقِ بے اماں معلوم ہوتی ہے

قفس میں رہ کے قدرِ آشیاں معلوم ہوتی ہے

کہانی میری رودادِ جہاں معلوم ہوتی ہے

جو سنتا ہے اسی کی داستاں معلوم ہوتی ہے

ہوائے شوق کی قوت وہاں لے آئی ہے مجھ کو

جہاں منزل بھی گردِ کارواں معلوم ہوتی ہے

قفس کی پتلیوں میں جانے کیا ترکیب رکھی ہے

کہ ہر بجلی قریبِ آشیاں معلوم ہوتی ہے

ترقی پر ہے روز افزوں خلش دردِ محبت کی

جہاں محسوس ہوتی تھی، وہاں معلوم ہوتی ہے

نہ کیوں سیماب مجھ کو قدر ہو ویرانیِ دل کی

یہ بنیادِ نشاطِ دو جہاں معلوم ہوتی ہے